سب کے حصے میں کئی بار ہے بٹ کر دیکھا
کچھ نہ حاصل ہوا منظر سے بھی ہٹ کر دیکھا
دور بیکار سا مبہم سا نظر آتا ہوں
کتنا آئینوں سے ہم نے تو چمٹ کر دیکھا
ہے مسلسل مرے سر دھوپ کسی صحرا سی
لاکھ دیواروں کے سائے سے لپٹ کر دیکھا
فرق ہونے سے نہ ہونے سے مرے کچھ بھی نہیں
بار ہا ہم نے کہانی میں سمٹ کر دیکھا
کتنی حسرت تھی کے انجام بدل جائے گا
ورق آخر کا کئی بار پلٹ کر دیکھا
پھر یہی ہوتا ہے رہ جاتے ہیں تنہا ہم ہی
وقت کے ساز کو، ہر لے کو الٹ کر دیکھا
جتنی شدت سے مرے خواب کو توڑا ہے گیا
اُتنی شدت سے وہی خواب ہے ڈٹ کر دیکھا
جو پرکھ سکتی ہمیں، آنکھ میسر نہ ہوئی
اپنی قیمت سے بھی ابرک نے تو گھٹ کر دیکھا
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔اتباف ابرک
