میں تو ہوں صرف قصہ خواں اس میں
دنیا تیری ہے داستاں اس میں
چاہے کوئی بھی دل ٹٹولو تم
کوئی رہتا ہے نیم جاں اس میں
کٹ رہا ہے شجر شجر یہ چمن
کیسے غافل ہیں باغباں اس میں
کبھی محفل تھی غم گساروں کی
آج رہتے ہیں بدگماں اس میں
خود جہاں دے گا آندھیوں کو خبر
تم بناو تو آشیاں اس میں
ہر تعلق ہے ناو کاغذ کی
اور محبت ہے بادباں اس میں
گھر بناو تو احتیاط کرو
رہ نہ جائے فقط مکاں اس میں
تھے فسانے کی آنکھ میں آنسو
ذکر آیا مرا جہاں اس میں
مل گئی تو گزار لی ہم نے
جیا جاتا ہے اب کہاں اس میں
ہم نے تو بارہا کہی دل کی
پر کسی کا نہیں دھیاں اس میں
یوں تو ساکت ہے زندگی میری
درد رکھا گیا رواں اس میں
شکوہ ہے تو حیات سے اتنا
جا رہا ہوں میں رائیگاں اس میں
یہ زمانہ ہے آئینہ ، ابرک
ڈھونڈتا کیا ہے خوبیاں اس میں
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
