تجھ سا سوچیں یا تجھ سا نم لکھیں
گر یہ سوچیں کبھی نہ ہم لکھیں
تیرے غم کو اگر سمجھ پائیں
اپنے غم کو کبھی نہ غم لکھیں
ہم نے سیکھا ہے جھوٹ یہ تم سے
قہقہوں سے غم و الم لکھیں
سانس جو موت بن کے آتی ہے
آپ کا دم ہے اس کو دم لکھیں
آخری ہے تو پھر محبت ہے
ورنہ اس کو فقط ستم لکھیں
جس گھڑی ہم نے تم کو دیکھا تھا
اس گھڑی کو مرا جنم لکھیں
زندگی کٹ نہیں رہی تم بن
لکھنے والے تو دو قدم لکھیں
کتنے گستاخ ہو گئے ابرک
ایلیا کو ہی ہم قلم لکھیں
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
