جب سے ہم پر نگاہِ ناز نہیں
سُر میں دنیا کا کوئی ساز نہیں
اپنے کہنے میں ساری دنیا ہے
ایک بس تم سے ساز باز نہیں
بانٹتا کون ہے فقیروں میں
یہ محبت کوئی نیاز نہیں
اک زمانے کو ہے کرید مری
اور سوا تیرے کوئی راز نہیں
رفتہ رفتہ ہوا ہوں دنیا سا
آنکھ ہے خشک، دل گداز نہیں
آئینہ بھی ہے سر پھرا لیکن
ہم سا وہ بھی زباں دراز نہیں
جی رہا ہوں مگر یہی سچ ہے
جئے جانے کا اب جواز نہیں
خوب جھانسے میں سارا عالم ہے
کوئی ابرک سا پاک باز نہیں
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
