زیست کا بھی ادب نہیں ہوتا
آپ اپنا میں اب نہیں ہوتا
عارضہ ہے عجیب یہ دل کا
جب تو ہوتا ہے تب نہیں ہوتا
یاد آتے ہیں غم میں اپنے سب
غم بھی لیکن یہ کب نہیں ہوتا
بھول بیٹھا ہوں دنیا داری کو
یہ دکھاوا بھی اب نہیں ہوتا
خوب ہنستا ہے تھک کے دیوانہ
رونا دھونا ہی اب نہیں ہوتا
اس نے آنے کی شرط رکھی ہے
اور میں جاں بہ لب نہیں ہوتا
سرد راتیں، وہ نیند، خواب ترے
ہم سے اب یہ بھی سب نہیں ہوتا
نیند جائے تو خواب ناں ٹوٹے
ہائے، ایسا غضب نہیں ہوتا
ہم پہ ہوتے ہیں فیصلے نافذ
اب یہ مجرم طلب نہیں ہوتا
سب ہیں عالی جناب، قد آور
بس ہمارا نسب نہیں ہوتا
جو دکھاتا تھا راہ منزل کی
وہ ستارا بھی اب نہیں ہوتا
لفظ تقدیر علم ہے رب کا
کچھ یہاں بے سبب نہیں ہوتا
جس کے ملنے کا ہو یقیں ابرک
اس کا کھونا عجب نہیں ہوتا
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔اتباف ابرک
